ရီးရဲလ်မက်ဒရစ်အသင်းအနေနဲ့ ဒီနေ့မှာ ဂိုးသမား ကူတွာ၊ ခံစစ်မှာ မီလီတို၊ အလာဘာ၊ ကာဗာဟယ်လ်နဲ့ ဖယ်လွန် မန်ဒီတို့ကို အသုံးပြုခဲ့ပြီး ကွင်းလယ်မှာတော့ တိုနီ ခရူးစ်၊ မိုဒရစ်ချ်နဲ့ ကာစီမီရိုတို့ကို အထိုင်ချခဲ့သလို ညာခြမ်းနဲ့ ကွင်းလယ်မှာတော့ ဗယ်လ်ဗာဒီက Hybrid Role နဲ့ အရှင်ကစားပြီး တိုက်စစ်မှာတော့ ဘင်ဇီးမားနဲ့ ဗီနီးရှပ်စ် ဂျူနီယာတို့ ပွဲထွက်လာခဲ့ကြတာဖြစ်ပါတယ်။

လီဗာပူးလ်တို့ကတော့ ဂိုးသမား အယ်လစ်ဆန်၊ ခံစစ်မှာ အလက်ဇန်းဒါး-အာနိုးလ်ဒ်၊ ဗန်ဒိုက်၊ ကိုနာတေနဲ့ ရောဘတ်ဆန်တို့ ကစားခဲ့ကြပြီး ကွင်းလယ်မှာတော့ ဟန်ဒါဆန်၊ ဖာဘင်ညိုနဲ့ သီယာဂိုတို့ရဲ့ အင်အားအပြည့်ဆုံး အတွဲအဖက်ကို မြင်ခဲ့ရသလို တိုက်စစ်မှာတော့ ဆာလား၊ မာနေးနဲ့ လူးဝစ် ဒီယက်ဇ်တို့နဲ့ စုစည်းလာခဲ့ကြတာပါ။

ပွဲစကတည်းက အန်ဆယ်လော့တီရဲ့ လူစာရင်းမှာ သံယောဇဉ်ရှိရှိနဲ့ သုံးနေပေမယ့် လုံးဝ ခြေစွမ်းမရှိတော့ဘဲ လူပိုလိုဖြစ်နေခဲ့တဲ့ တိုနီ ခရူးစ်ကြောင့် ရီးရဲလ်တို့ ဆယ်ယောက်နဲ့ ကစားနေရသလိုဖြစ်နေခဲ့ပြီး လီဗာပူးလ်တို့ရဲ့ ဒီယက်ဇ်နဲ့ ဆာလားတို့ရဲ့ တောင်ပံတွေက တော်တော်လေး ဖိအားပေးထိုးဖောက်နိုင်ခဲ့သလို ဂိုးသမား ကူတွာ ဗျာများဖို့ ဖြစ်လာခဲ့ရပါတယ်။

ပွဲချိန် ၁၆ မိနစ်မှာ ဆာလားရဲ့ အနီးကပ် ကန်ချက်ကို ကူတွာ ပုတ်ထုတ်သွားနိုင်ခဲ့သလို သီယာဂိုရဲ့ အမှတ်မထင် ကန်ချက်ကိုလည်း အေးအေးဆေးဆေးပဲ ဖမ်းယူသွားနိုင်ခဲ့ပြီး ပွဲချိန် ၁၇ မိနစ်အရောက်မှာတော့ ဆာလားရဲ့ ဧရိယာထိပ်က ကန်ချက်ကိုလည်း ဘယ်လ်ဂျီယမ်သားကြီးကပဲ စက္ကန့် ၆၀ အတွင်း တတိယအကြိမ်အဖြစ် အမှားအယွင်း မရှိဘဲ လက်အိတ်တစ်စုံကြားမှာ ငြိမ်သက်စေခဲ့တာပါ။

ဒီနေ့မှာ လီဗာပူးလ်တို့ရဲ့ High Tempo ကစားဟန်က အသင်းကို တိုက်စစ်မှာ သွက်လက်ထက်မြက်စေပေမယ့် တည်ငြိမ်မှု အထိုက်အလျောက် နည်းစေခဲ့ချိန်မှာ ရီးရဲလ်တို့ရဲ့ မယှဉ်နိုင်တဲ့ ဗျူဟာကို မယှဉ်ဘဲ ပိတ်ဆို့သွားခဲ့တဲ့ ခံစစ်ဦးစားပေး ကစားဟန်က အလုပ်ဖြစ်ခဲ့ပြီး ပါးနပ်လွန်းပြီး ဖိအားတွေကို လျော့ပါးစေတဲ့ မိုဒရစ်ချ်ရဲ့ ကွင်းလယ်ထိန်းကျောင်းမှုနဲ့ ကူတွာရဲ့ စွမ်းစွမ်းတမံ ကာကွယ်မှုတွေအတွက် အားလုံးအံ့အားသင့်ခဲ့ရတာဖြစ်ပါတယ်။

ပွဲချိန် ၂၁ မိနစ်မှာ မာနေးရဲ့ တစ်ကိုယ်တော်ကန်ချက်ကို ဂိုးသမား ကူတွာ ဒိုက်ပစ်ပြီး လက်နဲ့ ထိုးထုတ်ခဲ့တာက တိုင်ထိပြီး ပြန်ထွက်လာတာကို သူကပဲ ထပ်မံဖမ်းယူခဲ့ရသလို ပွဲချိန် ၃၄ မိနစ်မှာလည်း အလက်ဇန်းဒါး-အာနိုးလ်ဒ်ရဲ့ ခါးဖြတ်ဘော တင်ပေးတာကို ဆာလား ခေါင်းတိုက်ခဲ့ရာမှာ ကူတွာရဲ့ တည့်တည့်ပဲ ရောက်သွားခဲ့လို့ ရီးရဲလ်တို့အတွက်တော့ ဂိုးပေးရဖို့ ဝေးနေခဲ့တာပါ။

ပွဲချိန် ၄၃ မိနစ်မှာတော့ အလာဘာ ဖြတ်ပို့တဲ့ ဘောလုံးကနေ ဘင်ဇီးမား ရသွားခဲ့ပြီး သူပြန်ချိုးပေးတဲ့ ဘောလုံးကို ဖာဘင်ညိုနဲ့ ကိုနာတေတို့ ဝိုင်းဖျက်လို့ ထွက်လာခဲ့တာကို ပြင်သစ်သားကြီးက ထပ်မံပိတ်သွင်းခဲ့ရာမှာ ဂိုးထဲ ဝင်သွားခဲ့ပေမယ့် လူကျွံစည်းမျဉ်းသစ်အရ ဂိုးသွင်းသူရဲ့ ရှေ့မှာ ပြိုင်ဘက် ကစားသမားတစ်ယောက်(ရောဘတ်ဆန်)သာ ကျန်ခဲ့တော့လို့ လူကျွံဘောအဖြစ် VAR ပြန်ကြည့်ပြီး ပယ်ဖျက်ခံခဲ့ရပါတယ်။

ပထမပိုင်းမှာ လီဗာပူးလ်တို့ကတော့ လက်ဝှေ့စကားနဲ့ ပြောရရင် အစီးသရေရနေခဲ့ပြီး ရီးရဲလ်တို့ကတော့ ကူတွာရဲ့ လက်စွမ်းနဲ့ ဂိုးမပေးရဘဲ တောင့်ခံနိုင်ခဲ့ကြသလို ဒုတိယပိုင်းမှာလည်း ခံစစ်နဲ့ တန်ပြန်တိုက်စစ်ပဲ ဆက်ကစားနေခဲ့ပြီး ကူတွာကတော့ ပါးစပ်ဖျားက မချချင်အောင် နေရာယူပုံနဲ့ ဘောလုံးလမ်းကြောင်း တွက်ဆမှုတွေမှာ ပါးနပ်လွန်းခဲ့တာကြောင့် တစ်ဖက်က ဖြတ်တင်ဘောတွေကိုပဲ ပုတ်ထုတ်ဖျက်ဆီးနိုင်ခဲ့တာပါ။

ပွဲချိန် ၅၉ မိနစ်မှာတော့ ရီးရဲလ်မက်ဒရစ်တို့ အဖွင့်ဂိုးကို သွင်းယူနိုင်ခဲ့ပြီး လီဗာပူးလ်တို့ရဲ့ Pressing ကို ဘယ်ညာခြေနှစ်ချောင်းလုံး သန်စွမ်းပြီး အယိမ်းအနွဲ့တွေနဲ့ ဖောက်ထွက်နိုင်ခဲ့တဲ့ မိုဒရစ်ချ်ရဲ့ Breaking Pass ကနေ တန်ပြန်တိုက်စစ် စတင်ခဲ့ရာမှာ ညာခြမ်းကနေ အနိမ့်ဘော ဖြတ်ချိုးပေးခဲ့တဲ့ ဗယ်လ်ဗာဒီရဲ့ ပေးပို့မှုကို ဗီနီးရှပ်စ် ဂျူနီယာက အဝေးတိုင်ဘက်ကနေ ပိတ်သွင်းနိုင်ခဲ့လို့ စပိန်သားတွေ စတင်ဦးဆောင်နိုင်ခဲ့ပါတယ်။

ပွဲချိန် ၆၄ မိနစ်မှာတော့ ကာစီမီရိုရဲ့ ပေါ့လျော့မှုကနေ အတွင်းကို ချိုးဝင်လာခဲ့တဲ့ ဆာလားက အဝေးတိုင်ဘက်ကို အပိုင်ကန်သွင်းခွင့်ရခဲ့ပေမယ့် ကူတွာကပဲ မယုံနိုင်လောက်အောင် ဆန့်ထုတ်ကာကွယ်သွားနိုင်ခဲ့သလို ပွဲချိန် ၆၉ မိနစ်မှာလည်း ဆာလားရဲ့ ပိတ်သွင်းမှုကို နေရာမှန်မှာ မရှိပေမယ့် ထောင့်ကျဉ်းကို လျှောထိုးပိတ်ထားနိုင်ခဲ့လို့ လီဗာပူးလ်တို့ အပိုင်ဂိုးနှစ်ဂိုးလောက်ကို ၅ မိနစ်အတွင်း ဆုံးရှုံးခဲ့ရတာပါ။

ဒီနောက်ပိုင်းမှာ လီဗာပူးလ်တို့ဘက်က လူးဝစ် ဒီယက်ဇ်အစား ဂျိုတာ၊ သီယာဂိုအစား ဖာမီနိုနဲ့ ဟန်ဒါဆန်အစား ကီတာတို့ကို လဲကစားခဲ့ပေမယ့် ရီးရဲလ်ခံစစ်ကိုတော့ မကျော်နိုင်ခဲ့ဘဲဖြစ်နေခဲ့ပြီး ကူတွာကတော့ တစ်ပွဲလုံးမှာ ဂိုးပေါက်တည့်လာတဲ့ ဒိန်းဂျား ၉ ကြိမ်ကို တစ်ကြိမ်မှ မလွတ်စေခဲ့သလို ဆာလားရဲ့ ပွဲချိန် ၈၂ မိနစ် ကန်ချက်ကိုပါ ထပ်မံကာကွယ်သွားနိုင်ခဲ့တာကြောင့် အင်္ဂလန်ပရိသတ်တွေအတွက် ယုံကြည်စရာ ရှားပါးလာခဲ့ပါတယ်။

နောက်ဆုံးမှာတော့ အန်ချယ်လော့တီရဲ့ ပါးနပ်တဲ့ ဗျူဟာနဲ့ ရိုးရှင်းတဲ့ ကစားပုံကို ယာဂန် ကလော့ပ်ရဲ့ Gegenpress က မကျော်နိုင်ခဲ့တာကြောင့် ပွဲချိန်အပြည့်မှာ တစ်ဂိုး-ဂိုးမရှိနဲ့ ရီးရဲလ်မက်ဒရစ်တို့ အောင်ပွဲခံနိုင်ခဲ့ပြီး လီဗာပူးလ်တို့ကတော့ ရက်ပိုင်းအတွင်းမှာ ပရီးမီးယားလိဂ်ဆုဖလားကိုရော ချန်ပီယံလိဂ်ဆုဖလားကိုပါ လက်လွှတ်ခဲ့ရတာပါ။

ပြင်သစ်မြေ စတေဒီ ဖရန့်စ်ကွင်းကြီးမှာ ဗိုလ်စွဲနိုင်ခဲ့တဲ့ ရီးရဲလ်မက်ဒရစ်တို့အတွက်တော့ ဒီတစ်ခေါက် ဆုဖလားက ၁၄ ကြိမ်မြောက် စံချိန်တင် ရရှိတာဖြစ်ခဲ့သလို နည်းပြ အန်ချယ်လော့တီ၊ ဂိုးသမား ကူတွာနဲ့ ကွင်းလယ်လူ မိုဒရစ်ချ်တို့ရဲ့ စွမ်းဆောင်ရည်နဲ့ Genius ဆန်မှုတွေက ပွဲကြည့်ပရိသတ်တွေအတွက်တော့ အိပ်ရေးပျက်ရကျိုးနပ်တဲ့ ရှုချင်စရာ အောင်ပွဲတစ်ပွဲဖြစ်ခဲ့ကြောင်းလည်း သုံးသပ်ဖော်ပြလိုက်ရပါတယ်။